આનંદ આશ્રમ

મૂળ મહેલમાં વસે ગુણેશા.. તમે ભાંગો મારા દલડાની ભ્રાંતા… તોલરપરી રુખડિયો – ગણપતી – હસુભાઇ આચાર્ય

મૂળ મેલમાં વસે ગણેશા‚ ગુરુ ગમસે ગુણ પાતા‚

ગુણપતિ દાતા‚ મેરે દાતા હો… જી.

તમે ભાંગો મારા મનડાની ભ્રાંતા‚ તમે ભાંગો મારા દિલડાની ભ્રાંતા‚

ગુણપતિ દાતા‚ મેરે દાતા હો… જી.

તમે ખોલો મારા રૂદિયાના તાળાં‚ મેરા દુઃખ દારિદ્ર મટી જાતા‚

ગુણપતિ દાતા‚ મેરે દાતા હો… જી.

ધુપ ધ્યાન ને અખંડ આરતી‚ ગુગળના ધૂપ હોતા‚ ગુણપતિ દાતા‚

મેરે દાતા હો… જી.

રૂમઝુમ રૂમઝુમ નેપુર બાજે‚ ઝીણી ઝીણી ચાલ ચલંતા‚

ગુણપતિ દાતા‚ જીવો દાતા હો… જી.

ખીર ખાંડ ને અમરત ભોજન‚ ગુણપતિ લાડુ પાતા‚

ગુણપતિ દાતા‚ જીવો દાતા હો… જી.

શુધ બુધ નારી તેરી સેજ બિછાવે‚ નિત નિત ચમર ઢળંતા‚

ગુણપતિ દાતા‚ જીવો દાતા હો… જી.

ગુરુ પ્રતાપે બોલ્યા તોરલપરી‚ મરજીવા મોજું પાતા‚

ગુણપતિ દાતા‚ જીવો દાતા હો… જી.

સેવા મારી માની લેજો‚ સ્વામી રે સુંઢાળા રે‚ ગુણપતિ દેવા રે…ગોરખ – ગણપતી – મુળા ભગત

સેવા મારી માની લેજો‚ સ્વામી રે સૂંઢાળા રે‚ ગુણપતિ દેવા રે‚

પૂજા મારી માની લેજો‚ સ્વામી રે સૂંઢાળા રે‚ ગુણપતિ દેવા રે ;

ખોલો મારા રૂદિયાનાં તાળા‚ તોડો મારા કબુદ્ધિનાં ઝાળાં રે જી…

જળ રે ચડાવું દેવા ! જળ નથી ચોક્ખાં રે‚ હો જી…

ઈ જળ ઓલી માછલીએ અભડાવ્યાં રે….

સેવા મારી માની લેજો…૦

ફુલડાં રે ચડાવું દેવા ! ફુલ નથી ચોક્ખાં રે‚ હો જી…

ઈ ફુલ ઓલ્યે ભમરલે અભડાવ્યાં રે….

સેવા મારી માની લેજો…૦

દૂધ રે ચડાવું દેવા ! દૂધ નથી ચોક્ખાં રે‚ હો જી…

ઈ દૂધ ઓલ્યાં વાછરડે અભડાવ્યાં રે…

સેવા મારી માની લેજો…૦

ચંદન ચડાવું દેવા ! ચંદન નથી ચોક્ખાં રે‚ હો જી…

ઈ ચંદન ઓલ્યા ભોરીંગે અભડાવ્યાં રે…

સેવા મારી માની લેજો…૦

ભોજન ચડાવું દાતા ! ભોજન નથી રે ચોક્ખાં રે‚ હો જી…

ઈ ભોજન ઓલી માખીએ અભડાવ્યાં રે…

સેવા મારી માની લેજો…૦

મછંદરનો ચેલો જતિ ગોરખ બોલ્યા રે‚ હો જી…

આ પદ ખોજે‚ સોઈ નર પાયા રે…

સેવા મારી માની લેજો…૦